សៀមរាប៖ ចៅសង្កាត់ជ្រាវ ក្រុងសៀមរាប ខេត្តសៀមរាប លោក ក្អោប រ៉ន ថាអាជ្ញាធរកំពុងស្វែងរកជនខិលខូចដែលលួចសាងសង់របងរំលោភលើត្រពាំងបុរាណហែរផ្កា ដើម្បីឱ្យចូលខ្លួនមកធ្វើកិច្ចសន្យាបញ្ឈប់បោះបង្គោលរំលោកយកដីត្រពាំងបុរាណនោះបន្ដទៀត។
នៅថ្ងៃទី២០ ខែធ្នូនេះ អាជ្ញាធរសង្កាត់ជ្រាវ និងអាជ្ញាធរក្រុងសៀមរាប បានសហការគ្នាជាមួយអាជ្ញាធរជាតិអប្សរា ធ្វើការដកបង្គោលរបងថ្មចំនួន១៦០ដើម ដែលបានបោះរំលោភលើដីត្រញាំងបុរាណនេះដែលមានទីតាំងស្ថិតនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ដែលត្រូវកត់សម្គាល់ថាបានហ៊ំព័ទ្ធចំនួន៣ថ្ងៃមកហើយ។ ក្រៅពីការលួចបោះបង្គោលថ្មប៉ងយកដីក្នុងត្រពាំងបុរាណនោះ ក៏នៅមានប្រជាពលរដ្ឋ ៨គ្រួសារធ្វើផ្ទះនៅក្នុងត្រពាំងបុរាណនោះផងដែរ ប៉ុន្ដែអាជ្ញាធរបានចាត់វិធានការនិងឱ្យរុះរើនៅពេលក្រោយ។
ចៅសង្កាត់ជ្រាវលោក ក្អោប រ៉ន បានឱ្យដឹងថាត្រពាំងបុរាណត្រូវបានអាជ្ញាធរអប្សរាអនុញ្ញាតឱ្យត្រូវស្ដារឡើងវិញ។ ត្រពាំងបុរាណនេះ មានទំហំជាង២០០ម៉ែត្រការ៉េ ដែលស្មើនឹងបណ្ដោយជាង៤០ម៉ែត្រ គុណនឹងទទឹង៥០ម៉ែត្រនឹងត្រូវជីកស្តារជម្រៅបីម៉ែត្រ និងចាក់បំពេញមាត់ត្រពាំង ដើម្បីរៀបចំជារមណីដ្ឋានទេសចរណ៍ ដែលកិច្ចការនេះអាជ្ញាធរគ្រោងនឹងបញ្ចប់នៅចុងរដូវប្រាំងឆ្នាំ២០២២ខាងមុខ៕
